نۆشدارەک بەحس ل گڤاشتن و زکئێشا بەرى خولا هه‌يڤانه دكه‌ت
نوش نيوز، ئدریس ئاسیهى:
د. رێژین سلێمان سه‌عدی، تايبه‌تمه‌ندا نه‌خۆشيێن ژنان دياركر كو حالەتێ گڤاشتنێن زکى PMS بەرى کچ یان ژن بکەڤيته د دەورا خوە یا هەیڤانە ب رێژەیەکا مەزن يا بەربەلاڤە، لێ ڕویدانەکا سرۆشتیە و هۆکارێن وێ د زڤڕن ژ ڤەڕێژا چەند هۆرمۆنەکان د ناڤ لەشى دا، وەکۆ هۆرمۆنێ progesterone – GABA- Serotonin و گۆت: ئیشانا زکى و سینگى د گەل چەند گڤاشتنێن دەروونى و تێکچوونا هزرى، چەند نیشانەکێن پێشوەختن ئافرەت بەرى 10 – 14 ڕۆژان ژ ژڤانێ دەورا خوە تووش دبيتێ، زکئێشەکا دژوار پەیدا دکن؛ ئەڤە هەمى دبنه سەدەمێ کارتێکرنێ ل سەر ژیانا ڕۆژانە یا ژنێ.
زێده‌تر گۆت: ئەڤ حالەتێ ئەم لێ بەحس دکه‌ين يێ جیاوازە د گەل (ئێشانا زکى ئەوا ئێک هه‌تا دو ڕۆژان ڤەدکێشت، گەلەک گڤاشتنانێ ل سەر ژنێ ناکه‌ت).
د. رێژين دا زانين ژى كو ئەڤ حالەته ناهێتە دەستنیشانکرن ب رێکا پشکنینێن تاقیگەهان یان ب رێکا سۆنارێ بەلکۆ ب ڕێکا پشکنینا سەردەست ژ لایێ نۆشداری ڤە و پاشى بۆ ماوێ دو مەهان چاڤدێرى لێ دهێته کرن.
سەبارەت ب چارەسەریێ، تايبه‌تمه‌ندا نه‌خۆشيێن ژنان ئاشكه‌را كر كو چارەسەریا ڤى حالەتى ب چەند پێنگاڤەکان دهێت کرن وەکۆ:
- گوهۆڕینا شێوازێ ژیانا ڕۆژانە، وەکۆ کێمکرنا خوارنێ و ب کارئینانا خوارنێن کێم خوێ و گەلەک ڤەخوارنا ئاڤێ و خوارنا فێقى و کەسکاتیێ، ئەڤە هەمى دێ بن هۆکارێ کێمبوونا گازێن زکى و نەهێلان یان سڤککرنا ئێش و گڤاشتنێن زکى.
- وەرزشەکا سڤک و بەردەوام.
- نڤستن بۆ ماوێ 8 دەمژمێران و چەند ڕاهێنانێن خاڤبوونێ وەکۆ یۆگایێ .
- وەگرتنا هندەک ڤیتامیناتان.
- چارەسەرى ب دەرمانان، ل دووڤ حالەتى و بڕیارا نۆشدارى دمینيت.
ل دووماهيێ ژى گۆت: ئەڤ حالەت دماوێ دووگیانیێ و بەرى پێگەهشتنا کچێ و د ژیێ مەزن دا ناهێت.
