قولۆن چيه‌؟ كى تووش دبنێ؟ چاره‌سه‌رى چيه‌؟

نوش نيوز، ئدریس ئاسیهى:

تايبه‌تمه‌نده‌كێ نه‌خۆشيێن دل و هناڤا دياركر كو سێ جورێن قولۆنێ هه‌نه‌ و هاربوونا قۆلۆنێ به‌ربه‌لاڤترينه‌ و دا زانين ژى كو ژن دوجاركى هندى زه‌لامان تووش دبن و زێده‌تر ژى هه‌ژاران ڤه‌دگريت ژ زه‌نگينان.

د. بهائه‌دين به‌شار گۆت: “ب خوە قۆلۆن ناڤێ ڕیڤیکێن ستویرە و دویماهیک ڕێکە کۆ بەرمایکێن خوارنێ لێ دەرباز دبن، پشتى هلمژتنا کێمەک ژ پێداویستیێن لەشى و ب شێوەیەک شەپۆلی و ئارام کار دکت هەگەر مرۆڤ ساخلەم بت، لێ کارێ خوە یێ سرۆشتى ژ دەست ددت هەگەر نیشانێن ڤێ نەخوەشیێ دیاربوون؛ یان لڤینا وان ب لەز دکەڤت و مرۆڤ توشى زک چوونێ دبت یان ژى پێلا لڤینێ گەلەک لاواز دبت و مرۆڤ تووشی قەبزاتیێ دبت و ڤان هەردوو حالەتان ئەم ب ناڤ دکن هاربوون یان ئاریانا قۆلۆنێ (تهیج القولون)، دهێت هژماتن بەربەلاڤترین جورێ ڤێ نەخوەشیێ و ئەوە پتریا خەلکى گازندێ ژێ دکت.

گۆتژى: هەرچەندە دو جورێن دیژى ژ نەخوەشیا قۆلۆنێ هەنە، کولبوونا قۆلۆنێ و پەنجەشێرا قۆلۆنێ، لێ ژبەر کۆ هاربوونا قۆلۆنێ ب رێژەیەکا هەرى مەزن بەربەلاڤە ئەمێ ب کورتى بەحس لێ کن.

 د. بهائه‌دين به‌شار دا زانين ژى كو نیشانێن ئاریانێ ژ کەسەکى بۆ کەسەکێ دى جیاوازە ئانکۆ نیشان نە جهگیرن لێ ب شێوەیەک گشتى سێ نیشانێن سەرەکى هەنە وەکى وەرمین و ئێشانا زکى و زکچوون یان قەبزبوون.

تايبه‌تمه‌ندێ دل و هناڤا ئاماژه‌ ب وێ چه‌ندێ ژى كر كو چو هۆکارەکێ دەستنیشانکرى نینە بۆ هاربوونا قۆلۆنێ، لێ گەلەک جاران جورێن خوارنێ دبن هۆکار و ئەوژى ژ کەسەکى بۆ کەسەک دى جیاوازە و دیسان هۆکارێ بەکتیری و هزر و نەئارامى دبن پالدەرێن سترێس و گڤاشتنێن دەروونى و پاشان دبن مەزنترین هۆکار بۆ تیکچوونا ئارامیا کارێ قۆلۆنێ و نەرحەتیا مرۆڤى.

سەبارەت ب رێژا ڤێ نەخوەشیێ د ناڤا تەخێن جڤاکى و تەمەنى و مێ و نێران دا، دکتۆرى گۆت: “ئەڤ نەخوەشى د جڤاکێ مە دا پتر د ناڤ تەخا گەنجان دا بلندە و پتر دبن ژیێ پێنجى سالیێ دا، ژن دووجار پتر تووش دبن ژ زەلامان و بێ شک تەخا هەژار پتر تووش دبت ژ تەخا زەنگینان، لێ ل سەر ڤێ چەندێ ڕا پتریا خەلکى شارەزابوونە د ڤی جووڕێ قۆلۆنێ دا و ڕاهاتینە و دزانن سەرەدەریێ د گەل بکن.

د بەردەوامیا ئاخافتنا خوە دا دکتۆرى ئیشارەت ب چەند نیشانان دا وەکى زکچوونا ب شەڤ و دیتنا خوینێ د گەل دەستاڤێ و کێمبوونەکا بەرچاڤ یا سەنگى و دلڕابین و بلندبوونا پلا گەرماتیا لەشى، ئەڤ نیشان جیاوازان و دبن جهێ شکێ و دڤیا نەخوەش ب لەز پرسیارێ ل خوە بکت.

ل دووماهیێ د. بهائه‌دين به‌شار ئامۆژگارى ب وەرزشەکا ب ڕێک و پێک دا و گەلەک ڤەخوەرنا ئاڤێ و خوە دوورخستن ژ گوهدان و دیتنا جهـ و کەس و ئالاڤێن گڤاشتنێن دەروونى پەیدا دکن؛ و رێکخستن و شارەزایەتى د جووڕێن خوارنێ دا.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *