نەخۆشخانە و پێداچوونەک د پەیوەندیێن جڤاکی دا

دلدار محمد

نە یا ڤەشارتی یە، نەخۆشخانە یان (ساخلەمخانە )، ئەو جهە یێ نەخۆش سەرەدانێ بو دکەن و چارەسەریێ وەردگرن، هەتا دگەهنە ئاستێ ساخلەمبوونێ، و لبن چاڤدێرییا نۆشدارێن ماندونەناس د مینن، و پاشی ب رێزگرتن ڤه دەردکەڤن، و ژیانێ دەرباز دکەن، ئەڤ خزمەتە جهێ سۆپاسیێ نە و مرۆڤی دلخۆش دکەن، بەلێ یا کو جهێ مەندەهۆشبوونێ ئەوە نۆشدار بەردەوام، رێنماییا ددەن کو خەلک و کەس و کار و نێزیکێن نەخۆشی، سەرەدانێ نەکەن چونکی بو ساخلەمیا نەخۆشی نەیا باشە، پرۆسەیا چاکبوونێ یان گیرۆ دکەت یان ژی د ئێخیتە مەترسییێ، د سەر ڤێ چەندێ را، پشکەکا خەلکی سەرەدانێن نەخۆشخانان دبینن پێگیریەکا جڤاکی و نەچوون د دیتنا وان دا خالەکا لاوازیێ و جهێ شەرمزاریێ یە! د سەر هندێ را کو هێزێن پاراستنا ئیمناهییا هندەک نەخۆشخانان شەڤ و رۆژان دکەنە ئێک بۆ رێگریێ ل خەلکی بەلێ رەوش هەر وەکی جاران د مینیت و باخ و باخچەو مەمەرێن نەخۆشخانان ژ سەرەدان کەران د پرن و دیوانێن بەرفرەهـ و پری سوحبەت ددانن! ژبیرنەکەین رەنگە ئەڤە نە هێتە کرن، خودانێ نەخۆشی ژی دلگران ببیت و دەردورێن خۆ بێخیتە د قەفەسا تۆ مەتێ دا!
ئەڤ رەفتارو شێوەیێ هزرکرنێ ژ بلی سیمایەکێ نە شرینە ل نەخۆشخانێ، کەس و کارێن نەخۆشی ژی شەپرزە دکەت چونکی سەرەرایی رەوشا وان یا دەرونی یا ئالۆز، ئەو نەچاری هندەک پێگیریێن جڤاکی یێن نە ل دەم و جهێن گونجایی دبن، ئەگەر بەردەوامیا هەبوونا ڤان رەنگە دیمەنان پەیامەکێ بگەهینیت، ناڤەروکا وێ ئاستێ هشیارییا ساخلەمی و جڤاکی ژی یا تاکیێن جڤاکێ مە نە ل ئاستێ پێدڤی یه، ئەڤە سالا 22 ێ ژی ژ چەرخێ بیست و ئێکێ یا دەرباز دبیت هێشتا رەفتارا مە یا پێنجی سالێن بەری ڤێ سالێ یە، بۆ پەیداکرنا هشیاریێ هەموو دەزگەهێن میری و مەدەنی دداخوازکرینە بەلێ پشکا شێری ژ ڤی ئەرکی ببەر دەزگەهێن راگەهاندنێ دکەڤیت، کو ب بەرنامێن خۆ بچنە د مالێن ڤی خەلکێ ل پشت بەرێ کەڕ نڤستی ڤە و ببێژنێ یا تۆ دکەی ژبلی هندێ سەرپێچیەکا ساخلەمییێ یه و نە ژ دویر نە ژ نێزیک، رامانا خۆرتکرنا پەیوەندییان نادەت، بەلکو زیانەکا ئێکسەرە ب نەخۆشی دکەڤیت و وی بەرەڤ رەوشەکا خراب دبەت.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *