فریشتێن دلوڤانیێ‌

نوش نیوز

په‌رستاری ئێك ژ پێشه‌یێن كه‌ڤن و مرۆڤایه‌تی یه‌، چونكو گرێدانه‌كا راسته‌وخو ب ساخله‌میا مرۆڤی و پاراستنا ژیانا وی و كێمكرنا ئێش و ئازارێن وی و هه‌ستكرن ب ئێشانا وی هه‌یه‌، هه‌ر كه‌سێ‌ د ڤی واری دا كاربكه‌ت دبێژنێ‌ ( فریشتا دلوڤانیێ‌)، ژبه‌ركو رۆله‌كێ‌ مرۆڤایه‌تی یێ‌ كاریگه‌ر د قوناغێن جودایێن چاره‌سه‌ریێ‌ دا دبینن، ژلایێ‌ پزیشكی ژی ئه‌ڤ پێشه‌یه‌ خزمه‌تێن پزیشكی ته‌مام دكه‌ت، نوشدار كه‌سێ‌ ئێكێ‌ یه‌ كو سرۆشتێ‌ نه‌خۆشیێ‌ و جورێ‌ ده‌رمانێن پێدڤه‌ ده‌ستنیشان دكه‌ت، به‌لێ‌ چاڤدێریا حاله‌تێ‌ نه‌خۆشی لسه‌ر ملێن په‌رستارانه‌ و ب هه‌موو ره‌نگان كاردكه‌ن بو كێمكرنا ئێشان و ئازارێن نه‌خۆشی.
پێشه‌یا په‌رستاریێ‌ ژلایێ‌ رێكخراوا ساخله‌میا جیهانی هاتیه‌ پێناسه‌كرن كو ” هاریكاریا كه‌سانه‌ چ یێ‌ نه‌خۆش یان یێ‌ ساخله‌م بیت كو خوشیێ‌ ب ساخله‌میا خوه‌ به‌ت، ئه‌وژی ژچاڤدێریا په‌رستاران دهێت ب تایبه‌ت بو نه‌خۆشێن تووشی نه‌خۆشیێن ب مه‌ترسی دبن و د رۆژێن دووماهیێ‌ یێن ژیانا خوه‌ دابن.
هه‌روه‌سا په‌رستاری هاتیه‌ پێناسه‌كرن كو پێشه‌یه‌كه‌ دوارێ‌ پزیشكیێ‌ دا پێدڤیه‌ ب شێوه‌یه‌كێ‌ زانستی بهێته‌ ئه‌نجامدان، داكو شاره‌زایی په‌یداببیت، هنده‌ك رێنما و ئه‌تیكێن تایبه‌ت ژی ب خوه‌ڤه‌ هه‌نه‌، ئه‌و پێشه‌یه‌ یاكو گه‌له‌ك ئالاڤێن پزیشكی، ده‌روونی و مه‌عنه‌وی ب خوه‌ڤه‌دگریت ل ده‌مێ‌ ره‌فتاركرنێ‌ ل گه‌ل نه‌خۆشان و هاریكاریا وان بو چاره‌بوونێ‌.
ئه‌و كه‌سێ‌ په‌رستاریێ‌ بخوینیت پێدڤیه‌ ده‌ستووری ژ وه‌زاره‌تا ساخله‌میێ‌ و لایه‌نێن په‌یوه‌ندیدار هه‌بیت دابشێت وی گاری ئه‌نجامبده‌ت.
ئه‌رك و مافێن په‌رستاران:
•پێشكێشكرنا بلندترین ئاستێ‌ خزمه‌تێ‌ بو پاراستنا ساخله‌میا نه‌خۆشی و نه‌هێلیت چو سه‌ربارك و ئاریشه‌ بو نه‌خوشی په‌یداببن.
•پێشكێشكرنا خزمه‌تێن پزیشكی یان هاریكاریا په‌رستاریبو هه‌ر نه‌خۆشه‌كی بێی به‌رچاڤ وه‌رگرتنا ره‌نگ، ئایین، جێنده‌ر، چونكو پێشه‌یه‌كه‌ خزمه‌تا هه‌موویان وه‌كو ئێك دكه‌ت.
•پێدڤیه‌ هه‌موو شیانێن ب كاربینیت، چونكو تیماركرن ب شێوه‌یه‌كێ‌ گشتی یا گرێدای گیانێن مرۆڤانه‌ و نابیت بهێته‌ پاشخستن یان نه‌هێته‌ كرن، په‌رستارێ‌ دروست ئه‌وه‌ یێ‌ هه‌موو شیانێن خوه‌ بێخیته‌ كاری و خزمه‌تێن باش پێشكێش بكه‌ت.
•پێدڤیه‌ شیان هه‌بن وه‌كو تیم كاربكه‌ن ل گه‌ل تیمێ‌ پزیشكی، یێ‌ ئاماده‌بیت ل ده‌مێن ته‌نگاڤییان.
•ئاگه‌هداریا نه‌خوشی و كه‌سوكارێن وی بكه‌ت ل دور نه‌خۆشیا وی و هه‌موو پێزانینان ل دور چاره‌سه‌ریێ‌ پێشكێش بكه‌ت و نابیت نه‌خۆشی نه‌چاربكه‌ت بو وه‌رگرتنا چاره‌سه‌ریێ‌، به‌لكو نه‌خۆشی ئاگه‌هداربكه‌ت ل سه‌ر ئه‌نجامێن نه‌وه‌رگرتنا چاره‌سه‌ریێ‌.
•دووڤچوونا ره‌وشا نه‌خوشی بكه‌ت ل گه‌ل نوشدارێ‌ سه‌رپه‌رشت و چو ده‌رمانان بێی نوشداری نه‌ده‌ته‌ نه‌خۆشی.
•سه‌ره‌ده‌ریێ‌ ب دلوڤانی ل گه‌ل نه‌خۆشی بكه‌ت، خوه‌ ژێ‌ توره‌ نه‌كه‌ت ده‌مێ‌ تشته‌كی دكه‌ت كو بو ساخله‌میا وی خراب بیت.
•پێدڤیه‌ هه‌موو رێنمایێن ده‌زگه‌هێ‌ ساخله‌میێ‌ ئه‌وی لێ‌ كاردكه‌ت بجهبینیت.
•جلكێن تایبه‌ت ب په‌رستاریێ‌ بكه‌تێ‌ ل ده‌مێ‌ ده‌وامێ‌، هه‌تا هه‌كه‌ ب شه‌ڤ ژی بیت.
• نهێنیێن نه‌خۆشی یێن كه‌سایه‌تی و یێن نه‌خۆشیێ‌ بپارێزیت و نه‌گه‌هینیته‌ هه‌ڤالێن نه‌خۆشی یان هه‌ڤالێن خوه‌ یێن كاری.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *