نه‌خوشیێن دلی پتر ژ نه‌خوشیێن په‌نجه‌شێرێ‌ ژنان دكوژن

نۆش نیوز:

تشتێ‌ به‌رچاڤ ئه‌وه‌ كو نه‌خوشیێن دلی سالانه‌ پتر ژ نه‌خوشیێن په‌نجه‌شێرێ‌ ژنان دكوژن، یا ژڤێ‌ به‌رعاقلتر ئه‌وه‌ كو ئاریشه‌یێن دلی نوكه‌ گه‌له‌ك ب سانه‌هی كه‌تینه‌، ئه‌ڤه‌ نووترین رێكن كو ژ ئه‌نجامێ‌ ڤه‌كولینان ده‌رچووین سه‌باره‌ت چاڤدانا ساخله‌میا دلی:
* شیری ڤه‌خوو:
ڤه‌كولینه‌كا نوو كو ب چاڤدێریا په‌یمانگه‌ها نیشتمانی یا دلی و سه‌هان و خوینێ‌ هاتبوو ئه‌نجامدان دیاركریه‌ كو ئه‌و كه‌سێن گه‌له‌ك روینێ‌ تویر دخون وه‌كو شیری و نیڤشكی و په‌نیری ئه‌و پتر تووشی نه‌خوشیێن فشارا خوینێ‌ دبن و فشارا خوینێ‌ یا بلند ژی دبیته‌ ئه‌گه‌رێ‌ پووچكرنا ده‌مارێن خوینێ‌ و تووشبونێ‌ ب ئێشێن دلی و ژانه‌یا دلی، ڤه‌كوله‌ر دبێژن ئه‌و به‌رهه‌مێن سپیاتی یێن كێم روین دناڤدا هه‌ین گه‌له‌ك باشه‌ بۆ پاراستنا مرۆڤی ژ نه‌خوشیێن دلی.
* هنده‌ك لڤینێن نوو ب جه‌ربینه‌:
30 خوله‌ك رۆژانه‌ ژ وه‌رزشا (تای شوو) كو جوره‌كێ‌ نوو یێ‌ وه‌رزشا چینی یه‌ و پێكهاتیه‌ ژ گه‌له‌ك لڤینێن هێدی و ئارام دێ‌ شیان هه‌بن كو فشارا خوینێ‌ كێم بكه‌ت، د ڤه‌كولینه‌كا نوو دا هاته‌ دیاركرن كو ئه‌و كه‌سێن بۆ ده‌مێ‌ ساله‌كێ‌ ڤان جوره‌ راهێنانان دكه‌ن فشارا وان یا خوینێ‌ گه‌له‌ك هاته‌ خوارێ‌.
* هنار:
وه‌سان دیاره‌ كو شه‌ربه‌تا سروشتی یا هناران ره‌قبوونا خوینگێران كێم دكه‌ت و د هنده‌ك ده‌لیڤه‌یان دا خوینگێران دپارێزیت ژی، ڤه‌كولینه‌كا نوو كو ل ئه‌كادیمیا نیشتمانی یا زانستی هاتبوو ئه‌نجامدان دیاركریه‌ كو شه‌ربه‌تا سروشتی یا هناران دبیته‌ ئه‌گه‌رێ‌ كێمكرنا كومڤه‌بوونا كولیسترولی ب رێژا 30%، ئه‌ڤ ڤه‌كولینه‌ ل سالا 2006ێ‌ هاتبوو كرن و دیاركریه‌ كو هنار ب گه‌له‌ك رێكان وه‌كو چاره‌سه‌ری و خوپاراستن دهێته‌ ب كارئینان.
* ژدل بكه‌ كه‌نی:
ل ڤه‌كولینه‌كا كو ل قوتابخانا پزیشكی یا زانكویا میریلاند هاتیه‌ ئه‌نجام دان دیاردبیت ئه‌وێن كو ژیانا خۆ ل به‌ر فلمێن كومیدی دا دبورینن، خولا وان یا خویناوی زویكا و ب سانه‌هی دهێته‌ گوهارتن و ڤه‌كولینێ‌ دیاركر كو هه‌ر چ نه‌بیت پێدڤیه‌ مرۆڤ رۆژانه‌ چارێكه‌كێ‌ بكه‌ته‌ كه‌نی.
* خۆ ژ خه‌وێ‌ دوور نه‌كه‌ن:
ئه‌و ژنێن رۆژانه‌ كێمتر ژ پێنج ده‌مژمێران دنڤن ئه‌و ب رێژا 30% و پێهه‌لتر ژ وان ژنێن بۆ ده‌مێ‌ هه‌شت ده‌مژمێران دنڤن تووشی ئاریشه‌ و نه‌خوشیێن دلی دبن، كێم نڤستن ئاریشه‌یێن مه‌زن د هورمونان و فشارا خوینێ‌ و رێژا شه‌كرا دناڤ خوینێ‌ دا په‌یدادكه‌ت، له‌ورا ئه‌گه‌ر ته‌ چارێكه‌كێ‌ كره‌ كه‌نی و ب دووماهی هاتی باشتره‌ قه‌ستا نڤستنه‌كا كوور بكه‌ی.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *