دەمێ ئەزمونادا قوتابی توشی دل قوتان خوهدانەکا زێدە دبن
هندەک قوتابی ددەمێ ئەزموونان دا تووشی دلقوتان و خوهدانەکا زێدەدبن و چارەسەریا وان دکەین
نۆش نیوز، ره‌ڤین سالح:
هه‌ژین عه‌بدلقادر ده‌روونناس دیاركر دودلى ته‌شته‌كێ نورماله ل جه‌م هه‌موو كه‌سان هه‌یه، وگوت: لێ هه‌كه ئه‌ڤ دودلیه ل جه‌م قوتابیان زێده‌بوو دێ كارتێكرنێ ل ئاستێ وى یێ ده‌روونى و خاندنێ كه‌ت، هه‌كه یا كێم ژى بو یان ب ئێكجارى دودلى نه‌بیت كارتێكرن لێ دبیت كو وى پشته‌ڤانى بو خاندنێ نابیت، ل ده‌مێ ئه‌زموونا، گه‌له‌ك قوتابى دهێنه سه‌نته‌رێ ساخله‌مییا ده‌روونى یا زارۆ سنێله‌یان، هنده‌ك نیشان ل جه‌م وان دیار دبیت ماموستا فرێدكه‌نه ده‌ڤ مه، دبێژن ئه‌ڤ زارۆیه یێ زیره‌كه به‌لێ ده‌مێ ئه‌ز موونا گه‌له‌ك تێكدچیت و خوهدان بو په‌یدا دبیت، هه‌روه‌سان دلێ وى خوە گه‌له‌ك لێده‌ت، دیسان گه‌له‌ك جاران دپولێ ڤه دلرابوون یا بو په‌یدابووى و گێژبوویه، ئه‌ڤه هه‌موو نیشانێن دودلیێ نه ل ده‌مێ ئه‌زموونا.
ده‌روونناسێ خویاكر ژوان ئه‌گه‌رێن وه‌ل زارۆى بكه‌ن ئه‌ڤ دودلیه ل جه‌م وى زێده بیت كو خێزان نه‌یا هاریكاره، و گوت: ل ده‌مێ ئه‌زموونا فشاره‌كا مه‌زن دئێخیته سه‌ر زارۆیێن خوه، خێزان دێ بینى باب نوشداره یان ئه‌ندازیاره هوشداریێ دده‌تێ كو پێدڤییه ئه‌و نمره‌كا بلند بینت، یان به‌روڤاژى دێ هێیه سزادان، پێدڤییه دوڤچوونه‌كا به‌رده‌وام بو زارۆى بكه‌ى، سیسته‌مێ وى یێ خاندنێ یێ رێكوپێك بیت، وانه یێن خو نه‌هێلیته ل سه‌ر ئێك، دا رۆژا ئه‌زموونا دودلیا وى زێده نه‌بیت، هنده‌ك ژى دهێن ئاسته‌نگێن فێربوونێ هه‌نه، كو شیانێت وى یێن فێربوونێ هه‌تا راده‌كى نه، ئه‌و فشارا سترێسه‌كا زێده بو په‌یدا دكه‌ت، هه‌روه‌سان هنده‌ك قوتابى دبیت حه‌ز ژوی ماموستایێ و وانێ نه‌كه‌ت، دترسیت و ده‌مێ ئه‌زموونا تێك بچیت، دیسان گه‌له‌ك جاران زارۆى بو ئه‌زموونێ خوه به‌رهه‌ڤنه‌كریه، خه‌وا وى نه‌یا رێكو پێكه دره‌نگى شه‌ڤ یێ نڤستى، ئه‌ڤه هه‌موو ئه‌گه‌رن دودلى ل جه‌م زارۆى په‌یدا بیت.
هه‌ژین عه‌بدلقادر دازانین كو هنده‌ك چاره‌سه‌ریا بو دایك بابان دبێژن كو خارن و خه‌وا وان یا رێكوپێك بیت، و گوت: چونكو دماوێ ئه‌زموونان دا، گه‌له‌ك پێدڤى خارن وخه‌وه‌كا باش هه‌بیت، هه‌روه‌سان ده‌مێ ئه‌زموونا خوه دخوینت پێدڤى بێنڤه‌دانێ هه‌یه، نابیت ل سه‌ر ئێك بخینت، دیسان كه‌ش هه‌وایێ مالێ یێ ئارام بیت، دایك وباب ژى ته‌ماشه‌ى زارۆیێ خوه بكه‌ن كا پتر مه‌یلا وى ل سه‌ر چى یه و چ رێك هه‌یه پتر فێربیت، بگشتى ئاریشه دمالدا نه‌بن، مه هنده‌ك ته‌كنیك هه‌نه ل ده‌مێ چاره‌سه‌ریا ده‌روونى ئه‌م كاردئینن، زارۆ به‌رى بچیته ئه‌زموونێ هنده‌ك راهێنانێن ئارامبوونێ ئه‌م نیشا وان دده‌ین، ئه‌م بو دیاردكه‌ین كو ئه‌ڤه دودلى یا ل جه‌م ته هه‌ى و تشته‌كێ نورماله، هه‌روه‌سان دبێژینه وان هه‌كه تو نمرا ته‌مام نه‌به‌ى تشته‌كێ نورماله، ئه‌و زارۆیێن دهێن دژیێ شه‌ش سالى هه‌تا 18 سالى نه، ده‌مێ ئه‌زموونا رۆژانه نێزیكى پێنج حاله‌تان دبینن.
