ئه‌و دكتورێ‌ كورد یێ‌ ئێكه‌م دلێ‌ ده‌ستكرد ل جیهانێ‌ چێكری بو نۆش نیوز د ئاخڤیت

2020 ئه‌و دل دێ‌ بو مرۆڤان هێته‌ دانان

نۆش نیوز:
د.ئازاد نه‌جار، ئه‌و نۆشدارێ‌ كورد كو ل وه‌لاتێ‌ سوێدی كار د چێكرنا دلێ‌ ده‌ستكرد دا دكه‌ت دیاردكه‌ت كو ئه‌و نوكه‌ ل ژڤانێ‌ رازه‌مه‌ندیا FDA یا ده‌رمان و خواراكیا یا ئه‌مریكی یه‌ و دێ‌ شێت بو مرۆڤان ب كارئینیت، و گۆت: پێدڤیه‌ ئه‌و ده‌ستووریێ‌ بده‌ت و بێژیت كو ئه‌ڤه‌ ل دووڤ سالوخه‌تانه‌ و دێ‌ بو مرۆڤان ب كارئینین، چونكو ئه‌ڤ ئامیرێن ده‌ستكرد گه‌له‌ك ل ئوروپا چێنه‌بووینه‌، له‌ورا ئه‌و د شاره‌زا نینن د پێدانا ده‌ستووریێ‌ دا و پاش دێ‌ شێین ل ئوروپا و یابانێ‌ ژی ده‌ستووریێ‌ وه‌رگرین.
د.ئازاد نه‌جار دیاركر ژی ئه‌ڤه‌ دورێن ساله‌كێ‌ یه‌ وی داخوازا ده‌ستووریێ‌ كری و پتریا جاران سێ‌ سالێن بو دڤێن هه‌تا بشێین وه‌رگرین، چونكو وانژی مه‌رجێن خوه‌ هه‌نه‌ و ل دور مه‌رجان ژی گۆت: پێدڤیه‌ تێست ل سه‌ر گیانه‌وه‌ران ب دووماهی بهێت و ل تاقیگه‌هێ‌ ژی بده‌ینه‌ كاری و ڤه‌كولینێن خوینێ‌ ل سه‌ر بكه‌ین كا پالدانا خوینێ‌ و فشار یا دروسته‌ یان نه‌ و زڤیرنا خوینێ‌ و چاوانیا چێكرنا وێ‌ و هنده‌ك مه‌رجێن دیتر كو نوكه‌ زانكۆیه‌ك ل ئینگلته‌را پێ‌ رادبیت و دروست دكه‌ت.
هه‌روه‌سا دیاركر نوكه‌ ئه‌و سه‌رپه‌رشتیا تیمه‌كێ‌ پێكهاتی ژ 20 كه‌سان دكه‌ت و نوكه‌ ئه‌و د شه‌ش ڤه‌كولینان دا ل وه‌لاتێن به‌لچیكا و ئینگلته‌را و سوێد و ئه‌لمانیا كاردكه‌ن و گه‌له‌ك كار پێدڤیه‌ هه‌تا بشێن ب دووماهی دئینن.
د.ئازاد نه‌جار ل دووماهیا سالا 1999ێ‌ و بو ده‌مێ‌ سێ‌ سالان ب تنێ‌ ڤه‌كولین خواندینه‌ ل سه‌ر چاوانیا دروستكرنا دلی و ل سالا 2002ێ‌ دگه‌ل ئه‌ندازیاره‌كێ‌ ئیرانی بو ده‌مێ‌ چار سالان ل باژێرێ‌ ستوكهولم كاركریه‌ كو تایبه‌تمه‌ندیا وان ل سه‌ر چاوانیا برێڤه‌چوونا ئاڤێ‌ و شله‌مه‌نیا د ماتوران دابوویه‌ و شیان سێ‌ ڤه‌كولینان دروست بكه‌ن و د ئه‌نجامدا گه‌هشتنه‌ وێ‌ باوه‌ریێ‌ دێ‌ شێن سه‌ركه‌فتنێ‌ دچێكرنا دلێ‌ ده‌ستكرد دا كه‌ن، و ژ سالا 2007ێ‌ ده‌ست ب دروستكرنا نموونان دا كر و شیان كومپانیه‌كێ‌ بدانن و پتر كارێ‌ خوه‌ رێك بێخن.
دیاركر ژی نوكه‌ دل ب دروستی كاردكه‌ت و ل سه‌ر گیانه‌وه‌ران دایه‌ كاری و دروست كارێ‌ خوه‌ دكه‌ت و گۆت: نوكه‌ ئه‌م دشێین بو مروڤان ب كاربینین ل هنده‌ك وه‌لاتان، به‌لێ‌ ئه‌و ده‌ستووریێ‌ وه‌ربگرن باشتره‌ و گۆت: پار ئه‌م شیاین وی دلی وه‌لێ‌ بكه‌ین كو هزرێ‌ بكه‌ت وه‌كو یێ‌ سروشتی و خوینێ‌ پالده‌ت و به‌رهه‌م بینیت و پشتی ڤێ‌ چه‌ندێ‌ كره‌ د له‌شێ‌ به‌رخه‌كی دا و ئه‌و به‌رخ نوكه‌ دژیانێ‌ دایه‌ و دشێت بخووت و ڤه‌خووت و كارێن خوه‌ بكه‌ت.
هه‌روه‌سا دیاركر كو سالا 2022 ئه‌و دێ‌ ب شێوه‌یه‌كێ‌ فه‌رمی بو مرۆڤان ب كارئینن و دێ‌ سه‌ركه‌فتنه‌كا مه‌زن بیت د پێشڤه‌برنا ئاستێ‌ زانستی یێ‌ جیهانی دا.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *