ڤه‌خوارنا چایێ پشتى خۆارنێ بۆ ساخله‌میا زارۆكى یا باش نینه‌

نۆش نیوز، له‌زگین جوقى:
تایبه‌تمه‌نده‌كێ نه‌خۆشیێن خوینێ ل ده‌ڤ زارۆیان به‌حسێ زیانێن ڤه‌خوارنا چایێ ل ده‌ڤ زارۆیان پشتى نان خۆارنێ دكه‌ت و دبێژیت باشتره‌ زارۆك هه‌تا ژیێ پێنج سالیێ چایێ ڤه‌نه‌خۆن و پشتى پێنج سالیێ ژى ده‌مێ نان خۆارنێ نابیت ئێكسه‌ر چایێ ڤه‌خۆن ب كێماسى پشتى خۆارنێ ب سێ ده‌مژمێران ژ نوكه‌ چایێ ڤه‌خوون.
د. عبدولره‌حمان عه‌بدوللا محسن، تایبه‌تمه‌ندێ نه‌خۆشیێن خوینێ ل ده‌ڤ زارۆیان دیاركركو ل ده‌ڤ پتریا وه‌لاتیان داب ونه‌ریته‌ك چێبوویه‌ پشتى نانخوارنێ ئێكسه‌ر چایێ ڤه‌دخوون ئه‌و بخو كه‌رسته‌ك یێ دناڤ چایێ دا دژى مادێ ئاسنى یه‌، ئانكو خۆارنا مرۆڤ بخۆت چ جۆرێ ئاسنى دناڤ دایه‌ ئه‌و ئاسن پێدڤیه‌ دناڤ رووڤیكێن مرۆڤێ دا بهێنه‌ مێشتن، به‌لێ هه‌كه‌ چایێ پشتى خوارنێ ئیكسه‌ر ڤه‌خۆت ئه‌و مادێ ئاسنى ب وى كه‌رستێ دناڤ چایێ ڤه‌ دمینت دگه‌ل ده‌ستئاڤێ ده‌ركه‌دڤیت وناهێلیت بهێته‌ مێشتن، ژبه‌ر هندێ چا ڤه‌خوارن پشتى خوارنێ ئێكسه‌ر باش نینه‌، چونكو دبیته‌ ئه‌گه‌ر كێم خوینى دروست ببیت، ژبه‌ركو چا ناهێلیت له‌شێ مرۆڤى مفاى ژ وان ماده‌یێن دناڤ خوارنێ دا وه‌ربگریت، ژبه‌رهندێ هه‌كه‌ مرۆڤێ مه‌زن بیت و یێ ساخله‌م بیت، ره‌نگه‌ گه‌له‌ك كارتێكرنێ لێ نه‌كه‌ت به‌لێ هه‌ر باش نینه‌، به‌لێ هه‌كه‌ زارۆكه‌ك بیت و خوارنێ بخۆت و ئێكسه‌ر پشتى نانخوارنێ چایێ ڤه‌خۆت ئه‌و خرابیێن خوه‌ ل سه‌ر زارۆكى هه‌نه‌ هه‌تا پشتى 15 سالیێ و پێهه‌ل ژى باش نینه‌ پشتى خوارنێ چایێ ڤه‌خوون، له‌ورا ئه‌م ئاموژگاریان ل خه‌لكێ خوه‌ دكه‌ین خوه‌ ژ چایێ دوور بكه‌ن، ب تایبه‌تى ژى پشتى نانخوارنێ، ژبه‌ركو مرۆڤ ده‌مێ خوارنێ دخۆت ئه‌و خوارن دناڤ رووڤیكا دا دهێته‌ مێشتن و له‌شێ مرۆڤى مفاى ژێ وه‌ردگریت، به‌لێ ڤه‌خوارنا چایێ پشتى خوارنێ ناهێلیت ئه‌و خوارن ناڤ له‌شى دا بهێته‌ مێشتن.
ئاشكرا كركو هه‌كه‌ ژیێ زارۆكى ژ سیێ هه‌تا 15 سالیێ دا چایێ ڤه‌خۆت ده‌مه‌كێ گونجاى دا، ئانكو نه‌ پشتى خوارنێ بیت ئێكسه‌ر چو زیانێن وه‌سا نینن ب تایبه‌تى ژى هه‌كه‌ پشتى نانخۆارنێ ب سێ هه‌تا چار ده‌مژمێران ژ نوو چایێ ڤه‌خۆت چو زیانێن وه‌سا نابن .
ناڤهاتى زێده‌تر گۆت: مادێ كروڤاین دناڤ چایێ دایه‌ ئه‌ڤ مادده‌ بو زارۆكێن بچووك باش نینه‌ و كارتێكرنێ ل خه‌وا زارۆكان دكه‌ت و هه‌كه‌ خه‌وا زارۆكى بهێته‌ تێكدان ژى باش نینه‌ و دبیت كارتێكرن ل ده‌روونێ زارۆكێ بهێته‌ كرن، هه‌تا ژى مادێ كرۆڤاین دناڤ چایێ و پێپسى و هنده‌ك كه‌ره‌ستێن دى ژى دا هه‌یه‌ ره‌نگه‌ ده‌مێ زارۆك ب كاردئینت كارتێكرنَێ ل هه‌ستێ زارۆكى ژى بكه‌ن، ژبه‌ر ڤێ چه‌ندێ باشتر ئه‌وه‌ زارۆك دبن ژیێ پێنج سالیێ دا چایێ ڤه‌نه‌خۆن، باشتره‌ و دسه‌ر پێنج سالیێ دا هه‌تا 15 سالیێ ژى چایێ ڤه‌خوون به‌لێ پشتى نانخۆارنێ ب سێ هه‌تا چار ده‌مژمێران ژ نوو داكو زیان نه‌گه‌هیته‌ زارۆكى.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *