نۆژدارەک بەحس ل نەخوەشیێن ددانێن زاڕۆيان دکه‌ت

نوش نيوز، ئدریس ئاسیهى:

د. دلبرین عه‌باس نورى، تايبه‌تمه‌ندێ ددانا ل بەراهیێ بەحس ل ددانێن شیری کر و گۆت: ددانێن شیرى ب شێوەیەک گشتى ل مەها شەش ژ ژیێ زاڕووکى دەردکەڤن هەتا نێزکى چار سالیێ و دڤى ماوەى دا بتنێ 20 ددان بۆ زاڕووکى دەردکەڤن؛ 10لسەرى و  10 ل خوارێ .

وگۆت: ژبەر کۆ پیکهاتێ ددانێن شیرى بێ هێزە و هەستیەکێ دەمکى یە، لەوا ب لاوازى دهێن ل قەلەمدان، و لسەر دایکێ پێتڤیە گوهدانەکا باش ل زاڕووکى بکت دڤى تەمەنى دا، و یاباشترە ئەوە شیرێ سینگێ خوە بدتێ.

گۆتژى : شیرێ دەستکرد ب چو رەنگان جهێ شیرێ دایکێ ناگرت، نەخاسمە  تێکهەلکرنا وى ب شەکرێ، و شەکر هۆکارەکێ سەرەکى یێ کرمیبوون و ژ ناڤچوونا ددانایە و ومێهتنا سەرێ پلاستیکى یێ بتلى، دوورکەتنە ژ بێهن و هەمبێزا دایکێ و دبت هۆکارێ لاوازیا ماسۆلکێن دەڤى و تێکچوون و بچویکبوونا لامکا خوارێ یا دەڤێ زاڕووکى.

پتریا نەخوەشیێن ددانا ل پشتى چار سالیێ دەستپێدکن و هەر دەما نیشانێن نەخوەشیێ و ئێشانێ ل زاڕووکى دیاربوون لسەر دایک و بابان پێویستە ب زویترین دەم سەرەدانا نۆژدارى بکن بۆ چارەسەریێ ژبەرکۆ ددانێن شیرى شیانێن بەرخوەدانێ لبەر کرمیبوونێ نینن و دبن هۆکارێ کرمیبوونا ددانین خوەجه ژى، لەورا دڤیا دایک قورچەک ئاڤێ پشتى شیردانێ، ژبۆ نەهێلانا بوارێن شەکرێ لسەر ددانان بدت زاڕووکێ خوە.

وگۆت: دڤیا زاڕووک فێرى خوارنێن هشک ببت وەکوو خیار و گێزر و سێڤ…هتد، داکۆ گڤشاتن لسەر پودیان ببت و ببن هۆکارێ دەرکەتنا ددانێن خوەجه چونکە گیرۆبوونا کەتناد دانێن شیرى، نهۆ بوویە دیاردەیەکا جیهانى، ئەوژى ژبەر پتر پێدانا خوارنێن شلەمەنى بۆ زارووکى.

گۆتژى: ب چو ڕەنگان نابت ددانێ شیرى بێی وەرگرتنا تیشکێ بهێت دەرئینان، ب مەرەما پشتڕاستبوون ژ پێگەهشتنا ددانێ خوەجه و دبت ئینانا دەر یا ددانێ شیرى، گۆشتێ سەر پودیێ بهێز بکت و ببت ڕێگر بۆ دەرکەتنا ددانێ خوەجه یان هۆکارێ دەرکەتنەکا ڤاڕێبووى و ل دووماهیێ دبت هۆکارێ نە جوانیا دەڤ و ددانا و ببت هۆکارێ گرێکێت دەروونیژى و زاڕووک هەست ب کێماسیێ بکت.

دکتۆرى بەحس ل تل مێهتنێ کر و گۆت: تل مێهتن دیاردەیەکا بەرچاڤ وبەربەلاڤە ل دەڤ زاڕووکان ئەوژى پتر دزڤڕت بۆ هۆکارێ دەروونى و بەلکوو ب دەروونێ دایکێژى ڤە گرێدایە ئانکۆ دبت قنێتی(وراثێ)؛ بەلێ ب چ حالێ هەبت دڤیا پسیار ل هۆکارى بهێت کرن و رێکار بۆ نەهێلانا تل میهتنێ بهێن دەینان ب راوێژا نۆژدارێ تایبەتمەند چونکە تل مێهتن یەکە ژ هۆکارێن گرنگ بۆ تێکچوونا شێوازێ ددانا؛ زێدەبارى کەتنا زاڕووکى و کێمبوونا Vit D و دوورکەتن ژ لڤین و وەرزشێ.

د ئامووژگارییا خوە دا دکتۆرى گۆت: لسەر دایکێ فەرە پشکنێن خوە یێن دەورى بکت و پشت راست بت ژ ڕێژا ڤیتامین دى و  خوارنا کەسکاتى و فێقى و هەڤسەنگیەکا ساخلەم یا خوارنێ دبت هۆکارێ ورارا گشتى یا زاڕووکى و ئاڤاکرنا هەستیەکێ ساخلەم.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *