بۆچی هنده‌ك ل ره‌مه‌زانێ‌ قه‌له‌وتر لێدهێن؟

نۆش نیوز:
سه‌ره‌راری نه‌خوارن و ڤه‌خوارنێ‌ ژ ئه‌گه‌رێ‌ رۆژیگرتنێ‌ د هه‌یڤا ره‌مه‌زانێ‌ دا، گه‌له‌ك كه‌س قه‌له‌و دبن و قه‌له‌ویا وان ژبۆ نه‌دووڤچوونا شێوازه‌كێ‌ دروستێ‌ خوارنێ‌ و مژوولبوونا وان ب شه‌ڤێ‌ هه‌میێ‌ ب خوارنێ‌ ڤه‌ ڤه‌دگه‌ریت و دیسان نه‌ئه‌نجامدانا وه‌رزشێ‌ و وه‌رزش ژ كارێن گرنگه‌ دهه‌یڤا ره‌مه‌زانا پیروز دا داكو له‌شێ‌ مرۆڤی یێ‌ ب هێز بیت و دوباره‌ ب ڤه‌ژیته‌ڤه‌ و شێوازێن دروستێن خوارنا ساخله‌م باشترین ده‌رگه‌هن كو مرۆڤ ب ساخله‌می ژینا خۆ ببورینیت.
ژبۆ نه‌هێلانا قه‌له‌ویێ‌ د هه‌یڤا ره‌مه‌زانێ‌ دا پێدڤیه‌ هه‌ڤسه‌نگیه‌ك دناڤبه‌را خوارنا پاشیڤێ‌ و فتارێ‌ دا هه‌بیت و باشتره‌ خوارنا مرۆڤی یا پێكهاتی بیت ژ خوارنێن كو ( زوو بهێنه‌ هه‌رسكرن و مرۆڤی تێر بكه‌ن، كێم كاوری دناڤدا هه‌بن و گه‌له‌ك پێكهێنه‌ر و ژێده‌رێن خوارنێ‌ دناڤدا هه‌بن و له‌ورا ژی باشتره‌ مرۆڤ ده‌ستپپێبكه‌ت ب ڤه‌خوارنا ئاڤێ‌ یان شه‌ربه‌تێ‌ یان زه‌لاتێ‌ و دیسان باشتره‌ مرۆڤ دانه‌كی كاربوهیدراتان وه‌كو ( مه‌عكه‌رونا و پتات و برنجی) ب كه‌میه‌كا كێم بخوت، دگه‌ل زه‌لاته‌كا كه‌سكاتیێ‌ و خوارنا ماسیێ‌.هه‌روه‌سان دێ‌ باشتر بیت هه‌كه‌ شریناهی ب دو دانێن سڤك بهێنه‌ خوارن.
ژبوونا وێ‌ چه‌ندێ‌ مرۆڤ ب باشترین ساخله‌می رۆژیێن خۆ ببورینیت و قه‌له‌و نه‌بیت باشتره‌ مرۆڤ ل پاشیڤان زه‌لاتێ‌ و پارچه‌یه‌كا نانی یان گوشتی یان مریشكێ‌ بخوت دگه‌ل فێقی و ماستی و شوربێ‌ به‌لێ‌ پێدڤیه‌ گه‌له‌ك چه‌وری دناڤدا نه‌بن.
ل ده‌مێ‌ فتارێ‌ ژی باشتره‌ ماعونه‌كا شوربێ‌ دگه‌ل خوارنێن كاربوهیدری و زه‌لاتێ‌ بهێنه‌ خوارن و خوارنا شرینی ژی یا پێدڤیه‌ به‌لێ‌ بێی ئیسرافكرن، ب ڤی ره‌نگی هه‌ر كه‌سه‌ك دێ‌ شێت سه‌نگێ‌ خۆ راگریت و مرۆڤێن قه‌له‌و ژی ب شێوه‌یه‌كێ‌ سروشتی زه‌عیف دبن.
ژبوی مرۆڤ پاراستنا به‌ژ زراڤیا خۆ بكه‌ت یا پێدڤیه‌ ل دووڤ چه‌ند رێیه‌كان خوارنێ‌ ئاماده‌ بكه‌ت وه‌كو خوارنێن ب روین و شرین كێم بكه‌ت به‌لێ‌ نه‌كو ب ئێكجاری خۆ ژێ‌ دوور بكه‌ت، دیسان ڤه‌خوارن و شله‌مه‌نیێن ده‌ستكرد كێم بكه‌ت و ل جهێ‌ وان ئاڤه‌ماستێ‌ یان عه‌صیرا فێقی ڤه‌خوت و هندی دشیان دابیت دگه‌ل خوارنێ‌ ئاڤێ‌ و شه‌ربه‌تێ‌ نه‌ڤه‌خوت.
هنده‌ك ژ رۆژیگران ل ده‌مێ‌ ره‌مه‌زانێ‌ هنده‌ك خه‌له‌تیان دوارێ‌ خوارنێ‌ دا دكه‌ن و ئه‌و خه‌له‌تی دبنه‌ ئه‌گه‌ر كو سه‌نگێ‌ وان زێده‌ببیت و قه‌له‌و بن و ژ گرنگترین وان خه‌له‌تیان دێ‌ ده‌ست ب فتارێ‌ كه‌ن ب خوارنا گه‌له‌ك شریناهیان و ب شه‌ڤێ‌ هه‌میێ‌ دێ‌ به‌رده‌وام خوارنێ‌ خوون و ئه‌ڤه‌ كارتێكرنێ‌ ل سه‌نگێ‌ وان دكه‌ت. هه‌روه‌سان ل ده‌مێ‌ پاشیڤێ‌ هنده‌ك هه‌نه‌ دێ‌ خوارنێن پری روین دخون ب مه‌ره‌ما وێ‌ چه‌ندێ‌ كو برسی نه‌بن، ئانكو ب كورتی ئه‌م دشێین بێژین هه‌یڤا ره‌مه‌زانێ‌ بۆ هنده‌ك ژ خه‌لكی وه‌كو فیسته‌ڤالا خوارنێ‌ یه‌ و ئه‌ڤ چه‌نده‌ ل دهۆكێ‌ ژی یا به‌رچاڤه‌ و دبیته‌ ئه‌گه‌رێ‌ قه‌له‌ویێ‌ و دیسان راسته‌ هنده‌ك كه‌سێن نه‌خوش ژی مفای ژ ره‌مه‌زانێ‌ دبینن ده‌مێ‌ خوارنێ‌ كێم دخون به‌لێ‌ ب شه‌ڤێ‌ دوباره‌ ده‌ست ب خوارنێ‌ دكه‌نه‌ڤه‌ و یا باشتر ئه‌وه‌ ل جهێ‌ ڤێ‌ چه‌ندێ‌ رۆژیگر خو ب وه‌رزشێ‌ ڤه‌ مژوول بكه‌ت داكو هێز و شیانێن وی بهێنه‌ ڤه‌ژاندن و بشێت كارێن خو یێن رۆژانه‌ ئه‌نجام بده‌ت.

زێده‌تر نیشان بده‌

حه‌مزه‌ ره‌زيكى

حه‌مزه‌ ره‌زیكی: ژدایكبوون 1974 ل سالا 1992ێ‌ وه‌ره‌ كارێ‌ رۆژنامه‌ڤانیێ‌ دكه‌ت ل ( رادیو، تێله‌فزیون، رۆژنامه‌، رۆژنامه‌ڤانیا ئه‌لكترونی). ل سالا 1995ێ‌ وه‌ره‌ ل راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ‌ كاردكه‌ت. facebook:hamze mohammed ali

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *