پێنج شیره‌ت بو چاڤدێریا جێمكان

نۆش نیوز:
چاڤدێریا زارۆیێن نوو بووین دبیت ل ده‌ستپێكێ‌ یا ب زه‌حمه‌ت بیت، ب تایبه‌ت هه‌كه‌ ژن ژی جارا ئێكێ‌ بیت دبیته‌ دایك، ئه‌ڤجا دێ‌ چاوا بیت هه‌كه‌ جارا ئێكی بیت و جێمكه‌ك ببیت، ل ڤێرێ‌ مه‌ كومه‌كا شیره‌تان كومكرینه‌ ژلایێ‌ دایكانڤه‌ هاتینه‌ ئاراسته‌كرن و هه‌لبه‌ت هه‌ر دایكه‌كێ‌ شێوازه‌كێ‌ تایبه‌ت یێ‌ هه‌ی بو چاڤدێریا زارۆیان، له‌ورا تشتێ‌ دگه‌ل ته‌ بگونجیت وی بهه‌لبژێره‌:
1- رۆتین: ره‌نگه‌ روژانه‌ وه‌كو ئێك تو چاڤدێریا زارۆیێ‌ خوه‌ نه‌گه‌ی، به‌لێ‌ یا باشه‌ ته‌ رۆتینه‌ك هه‌بیت داكو ب سااناهی بكه‌ڤیت، دایكه‌ك دیاردكه‌ت وێ‌ جێمكه‌ك هه‌بوو و پێكڤه‌ شیری ددایێ‌ و سه‌رێ‌ وان دشووشت و دنڤاندن و هه‌كه‌ نیڤا شه‌ڤێ‌ ئێك ژ خه‌و راببا یێ‌ دیتر رادكر دا شیری بده‌تێ‌، ب ڤێ‌ رێكێ‌ وێ‌ پیچه‌ك بێهنا خوه‌ ڤه‌ددا، بلا ل بیرا ته‌بیت نه‌مه‌رجه‌ تو یا پێگیر بی ب ڤی روتینی و دبیت تو ل دووڤ تشته‌ك دیتر بچی بوته‌ ب ساناهیتر بیت.
2- كارۆبارێن خوه‌ ب ساناهی بكه‌: هه‌ر تشته‌كێ‌ نه‌ گرنگ بیت ل دووڤ نه‌چه‌ و بهێله‌، ئه‌ركێن ناڤمالێ‌ ل دووڤ گرنگیا وان ئه‌نجام بده‌، یێن گرنگ شووشتنا ئامانا و پاق كرنا جلكانه‌، تشتێن دی وه‌كو ته‌رتیبكرنا كه‌نتورێن جلكا و شووشتنا مه‌حفیر و موكێتان و په‌ردا بهێله‌ هه‌تا ده‌مێ‌ وان دهێت.
3- هاریكاری: هه‌ر ئێكێ‌ هاریكاریا ته‌ بكه‌ت ژێ‌ وه‌ربگره‌، چونكو خودانكرنا دو زارۆیان جوداهی هه‌یه‌ دگه‌ل ئێكێ‌، له‌ورا هه‌ر ئێكێ‌ هاری ته‌ بكه‌ت رێكێ‌ لێ‌ نه‌گره‌ هه‌ر چه‌ند یا بچووك بیت ژی، هاریكاریا خێزانێ‌ دگه‌ل ته‌ دێ‌ بیته‌ هانده‌ره‌ك پتر چاڤدێریا زارۆیێن خوه‌ بكه‌ی.
4- رێكخستن: به‌ری زارۆبوونێ‌ مالا خوه‌ لێك بده‌ و رێكبێخه‌ ب ره‌نگه‌كی كو هاریكاریا ته‌ بكه‌ن بو پێشوازیا جێمكان، ڤێ‌ پێنگاڤێ‌ نه‌هێله‌ بو پشتی زارۆبوونێ‌ چونكو ته‌ ده‌مێ‌ پێدڤی نابیت، هه‌ر تشتێ‌ ته‌ پێدڤی پێ‌ نه‌بیت بهاڤێژه‌ و تشتێن پێدڤی بدانه‌ جهێ‌ وان یێ‌ تایبه‌ت ب تایبه‌ت یێن پێدڤی بو جێمكا و بزانه‌ دێ‌ ل كیڤه‌ و چاوا چاڤدێریا وان كه‌ی.
5- بێهنا خوه‌ ڤه‌ده‌: راسته‌ كو دایكینی قوناغه‌كا ب زه‌حمه‌ته‌، به‌لی یا خوشه‌ و دێ‌ گه‌له‌ك ده‌لیڤێن خوش بوته‌ په‌یداكه‌ن و هه‌كه‌ ته‌ ئاریشێن بچووك هه‌بن ژبیربكه‌ و ب باشیان بگوهوره‌ و بزانه‌ چه‌ند جێمك مه‌زن ببن دێ‌ پتر هه‌ست ب خوشیێ‌ كه‌ی.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *