كیش شه‌ڤێ‌ زه‌لام ل ده‌رمانێن سێكسی دگه‌ریێن؟

نۆش نیوز:
زه‌لام ل گه‌له‌ك شه‌ڤان ل ده‌رمانێن چاره‌كرن و چالاككرنا سێكسی دگه‌ریێن، شه‌ڤا ئێكێ‌ یا زاڤایینیێ‌، ژ ئه‌نجامێ‌ نه‌بوونا باوه‌ری ب خوبوونێ‌ و شه‌ڤێن نورمال پشتی وه‌ستیان و دامابوونێ‌ و گه‌له‌ك شه‌ڤان ژی ژ هنده‌ك ئه‌گه‌رێن نه‌دیار زه‌لام ب ڤی كاری رادبن.
چ كه‌سه‌ك نینه‌ ئاگه‌ه ژ ده‌رمان و چالاككه‌رێن سێكسی نه‌ببیت، له‌ورا ژی هه‌ر ئێك ل لایێ‌ خوه‌ ل ده‌رمانێن سێكسی دگه‌ریێت د هنده‌ك ده‌لیڤه‌یێن ده‌ستنیشانكری دا و ره‌نگه‌ هه‌موو ده‌لیڤه‌ژی ددروست نینن بۆ ب كارئینانا ڤان جوره‌ ده‌رمانان و گه‌له‌ك زه‌لام ژی هه‌بن كو مفای ژێ‌ نه‌بینن، یان گه‌له‌ك زه‌لام هه‌بن شه‌رم بكه‌ن پرسیارا وان بكه‌ن و شه‌ڤه‌كا تال نه‌ ژ لایێ‌ شیانێن سێكسی به‌لكو ژلایێ‌ حه‌زا سێكسی ببوورینن، شه‌ڤه‌ك كو زه‌لام و هه‌ڤژینا خوه‌ د هه‌ڤدو نه‌گه‌هن و ئه‌گه‌رێن وێ‌ د دیارنه‌بن و هه‌ڤكاری دناڤبه‌را وان دا نه‌بیت.
ده‌مێ‌ من پرسیار ل نوشداره‌كی كری: ئه‌رێ‌ زه‌لامێن كو شیانێن وان یێن سێكسی د كێم بن، رێژه‌یا وان د زێده‌بوون یا كێمبوونێ‌ دایه‌؟ گۆت: ژ ئه‌نجامێ‌ وێ‌ چه‌ندێ‌ كو ب ده‌هان ناڤێن ده‌رمانێن چالاككه‌رێن سێكسی ل بازاری هه‌نه‌ و سه‌ره‌رای مه‌ترسیێن وان بێی راچێتا نوشداران ژی دهێنه‌ فرۆتن، له‌ورا ئه‌م چ ژ رێژه‌یا وێ‌ نزانین، به‌لێ‌ گه‌له‌ك كه‌س یێن هه‌ین مفای ژێ‌ نابینن و پشتی ده‌مه‌كی دێ‌ هێنه‌ ده‌ڤ مه‌، دێ‌ دیاربیت كو فشارێن ده‌روونی و كارێن رۆژانه‌ و نه‌بوونا وه‌كهه‌ڤیا حه‌زێن وی ل گه‌ل هه‌ڤژینا وی بوویه‌ ئه‌گه‌ر كو ئه‌وی شیانێن ئه‌نجامدانا كریارا سێكسی نه‌بن و پێدڤیه‌ زه‌لام ڤێ‌ چه‌ندێ‌ بزانن و هزر ل شه‌ڤه‌كا پری بزاڤا سێكسی نه‌كه‌ن.
ل ڤێرێ‌ مه‌ ڤییا ئه‌م ئاماژه‌ ب خاله‌كێ‌ بده‌ین، ئه‌رێ‌ جوداهی دناڤبه‌را حه‌زا سێكسی و شیانێن سێكسی چیه‌؟
حه‌زا سێكسی دبیت بۆ زه‌لامان نه‌مینیت و نه‌شێن سێكسی ئه‌نجام بده‌ن، بۆ نموونه‌ ل ده‌مێ‌ تووشی نه‌خوشیا شه‌كرێ‌ دبن یان گه‌له‌ك كه‌رسته‌یێن كحولی ب كاربینن، ل وی ده‌می ده‌رمانێن ڤیاگرا چ مفایێ‌ خوه‌ نابینن، به‌لكو هنده‌ك ده‌رمانێن دی هه‌نه‌ وه‌كو كورتیزون و هورمونێ‌ نێرینه‌ و كزكایین، ره‌نگه‌ژی د هنده‌ك هه‌لویستێن تایبه‌ت دا مرۆڤی حه‌زا سێكسی نه‌مینیت بۆ نموونه‌ ژ شه‌رمكرنێ‌، یان ل ده‌مێ‌ زه‌لام ده‌رمانێن بێهوشكرنێ‌ ب كاردئینن، یان گه‌له‌ك جگاره‌یان بكێشن، ل دووڤ ڤه‌كولینان دیاربوویه‌ ئه‌و زه‌لامێن ده‌ست ژ جگاره‌كێشانێ‌ به‌ردده‌ن حه‌زا وان یا سێكسی پتر لێ‌ دهێت.
پتریا نه‌خوشیان حه‌زا زه‌لامی بۆ سێكسی كێم دكه‌ن و ده‌رمانێن چالاككرنا سێكسی گه‌له‌ك مفایێ‌ خوه‌ نابینن، هه‌كه‌ هات و زه‌لام تووشی نه‌خوشیه‌كێ‌ بوو و حه‌زا وی یا سێكسی زێده‌بوو! ل وی ده‌می ره‌نگه‌ ژ ئه‌نجامێ‌ هه‌بوونا كه‌رسته‌یێن پێدڤی بیت دناڤ وان ده‌رمانێن كو بۆ چاره‌سه‌ریا خوه‌ ب كاردئینیت.
له‌ورا نابیت زه‌لامێ‌ حه‌زا سێكسی نه‌بیت ده‌رمانێن بهێزكرنا سێكسی ب كاربینیت، به‌لكو پێدڤی ب هنده‌ك تشتێن دیتره‌ كو پێدڤیه‌ ئه‌نجام بده‌ت و بێی ده‌رمان دێ‌ هێته‌ چاره‌سه‌ركرن، ئه‌ڤه‌ژی پێدڤی ب وه‌رگرتنا شیره‌تان ژلایێ‌ نوشداره‌كێ‌ تایبه‌تمه‌ند هه‌یه‌.

زێده‌تر نیشان بده‌

حه‌مزه‌ ره‌زيكى

حه‌مزه‌ ره‌زیكی: ژدایكبوون 1974 ل سالا 1992ێ‌ وه‌ره‌ كارێ‌ رۆژنامه‌ڤانیێ‌ دكه‌ت ل ( رادیو، تێله‌فزیون، رۆژنامه‌، رۆژنامه‌ڤانیا ئه‌لكترونی). ل سالا 1995ێ‌ وه‌ره‌ ل راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ‌ كاردكه‌ت. facebook:hamze mohammed ali

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *