ئه‌رێ‌ مرۆڤ دشێت نه‌خۆشیا خوه‌ ده‌ستنیشان بكه‌ت؟

حه‌مزه‌ ره‌زیكی:
ئاریشه‌یا گه‌له‌ك ژ خه‌لكی ئه‌وه‌ خوه‌ شاره‌زا ددانن و هه‌ول دده‌ن ئه‌و ب خوه‌ نه‌خۆشیا خوه‌ ده‌ستنیشان بكه‌ن بێی كو قه‌ستا نوشداره‌كێ‌ تایبه‌تمه‌ند بكه‌ن و پشكنینان ئه‌نجام بده‌ن.
ئه‌ڤه‌ پتر ل ده‌ڤ نه‌خۆشێن ده‌روونی هه‌یه‌ و ره‌نگه‌ بۆ كه‌سانێن نه‌خۆش ب ده‌روونی وه‌كو بێئارامی و خه‌موكیێ‌ ب ساناهیتر بیت نه‌خوشیێن خوه‌ ده‌ستنیشان بكه‌ن، به‌لێ‌ ئاریشه‌ نه‌ ب تنێ‌ دده‌ستنیشانكرنێ‌ دایه‌، به‌لكو ده‌مێ‌ ئه‌و كه‌س هزر دكه‌ت یێ‌ تووشی نه‌خوشیه‌كێ‌ بووی، دێ‌ قه‌ستا هه‌ڤاله‌كێ‌ خوه‌ كه‌ت و چیروكا خوه‌ بۆ بێژیت و هه‌ڤالێ‌ وی هنده‌ك جاران خوه‌ ل شوونا نوشداری دادنیت و ره‌نگه‌ ناڤێن هنده‌ك ده‌رمانان بێژیتێ‌ و ئه‌وژی قه‌ستا ده‌رمانخانه‌یه‌كێ‌ بكه‌ت و بێی راچێت ده‌رمانان وه‌ربگریت و وی چ پێدڤی ژێرا نه‌بیت و سه‌رباركێن ب مه‌ترسی ژێ‌ په‌یداببن و ژنوو نه‌خوش ببیت.
هنده‌ك كه‌س ژی وه‌سان هه‌ست دكه‌ن وان نه‌خۆشیێن ئه‌ندامی یان له‌شی هه‌نه‌ و وه‌سان هزر دكه‌ن كو نیشانێن نه‌خۆشیێن وان وه‌كو یێن كه‌سه‌كێ‌ نێزیكی وانن و ره‌نگه‌ ب خوارنا ده‌رمانێن هنده‌ك ژ ناسیارێن خوه‌ ئه‌و چاره‌یا خوه‌ بكه‌ت، ئه‌ڤ چه‌نده‌ مه‌ترسیه‌كا مه‌زن ل سه‌ر ژیانا نه‌خۆشی په‌یدادكه‌ت و نه‌دووره‌ د ئه‌نجامدا سه‌ربارك ژێ‌ په‌یداببن و چاره‌یا وی ئالوز ببیت.
ژبه‌ركو هنده‌ك ده‌رمانێن ب مه‌ترسی هه‌نه‌، بۆ نموونه‌ گه‌له‌ك ژ مرۆڤێن ساخله‌م ده‌رمانێن خوه‌زه‌عیفكرنێ‌، یان كێمكرنا كولیسترولی، یان حه‌بكێن سه‌رئێشان و زكئێشان و دلرابوونێ‌ بێی راچێتا نوشداری ب كاردئینن، ئه‌وان ده‌رمانان ژی وه‌كو یێ، دی كه‌رسته‌یێن كیمیاوی دناڤدا هه‌نه‌ و دڤێت ب ئاگه‌هی و هوشیاری بهێنه‌ ب كارئینان.
ب كارئینانا هنده‌ك ده‌رمانێن ده‌روونی ب تایبه‌ت ئه‌وێن ئارامكرنێ‌ و یێن هاریكاریێ‌ دكه‌ن كو خه‌وا مرۆڤی بهێت پێدڤیه‌ ب هووربینی ل سه‌ر ب راوه‌ستن و گه‌له‌ك دووڤچۆنێ‌ بكه‌ن دا ب شێوه‌یه‌كێ‌ زانستی بهێنه‌ ب كارئینان و نه‌بنه‌ ئه‌گه‌رێ‌ ئیدمانێ‌ و هنده‌ك جاران ژی دبنه‌ مه‌ترسیێ‌ ل سه‌ر هه‌ناسه‌یا مرۆڤی په‌یدادكه‌ن ب شه‌ڤێ‌، ژبه‌ركو حه‌بكێن خه‌و هاتنێ‌ بێهشكرنه‌كێ‌ ل سه‌نته‌رێ‌ هه‌ناسێ‌ د مێشكی دا دكه‌ن.
له‌ورا ژی راسته‌ كو هنده‌ك جاران نیشانێن نه‌خۆشیا مرۆڤه‌كی وه‌كو یێن ئێكێ‌ دیترن، به‌لێ‌ ئه‌ڤه‌ رامانا وێ‌ چه‌ندێ‌ ناده‌ت كو هه‌ر ئه‌و نه‌خۆشیه‌، ده‌ستنیشانكرنا نه‌خۆشیان كارێ‌ نوشدارانه‌ و ب رێیا پشكنین و تیشك و …هتد، دهێته‌ كرن.

زێده‌تر نیشان بده‌

حه‌مزه‌ ره‌زيكى

حه‌مزه‌ ره‌زیكی: ژدایكبوون 1974 ل سالا 1992ێ‌ وه‌ره‌ كارێ‌ رۆژنامه‌ڤانیێ‌ دكه‌ت ل ( رادیو، تێله‌فزیون، رۆژنامه‌، رۆژنامه‌ڤانیا ئه‌لكترونی). ل سالا 1995ێ‌ وه‌ره‌ ل راگه‌هاندنا رێڤه‌به‌ریا گشتی یا ساخله‌میا پارێزگه‌ها دهۆكێ‌ كاردكه‌ت. facebook:hamze mohammed ali

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *