دەرمانێن سێکسی و حەفازێن عادەیا ھەیڤانە

حەمزە رەزبکی:
سەرەرای کو ھەبوونا کوندومان و حەبێن فیریانا سێکسی ھندەک تشتێن زانستینە و وەکو شورەشەکێ بووینە د جیھانا ساخلەمیێ دا، بەلێ زەلام شەرم دکەن داخوازا وان ژ دەرمانسازان بکەن و ژن و کچ ژی شەرم دکەن داخوازا حەفازێن عادەیا ھەیڤانە بکەن و ئەڤ چەندە دبیتە ئەگەر کو مفایەکێ دروست ژێ نەھێتە دیتن.
گەلەک جاران زەلام شەرم دکەن داخوازا کوندومان بکەن، نەچاردبن ل دەمێ ھەڤژینێن وان دچنە لایێ نوشدارەکا ژنان دێ بێژنێ کوندومان بۆ زەلامێن مە بنڤیسە و ژن چ جاران داخوازا دەرمانێن سێکسی یان کوندومان و ھەتا حەفازەیان ژی ژ زەلامێن ل بەر دەرمانخانێ ناکەن، بەلکو دێ چنە لایێ کچەکێ ل دەرمانخانێ و ب دەنگەکێ نزم دێ پرسیارا وان دەرمانان کەت. ژیەرکو زەلام یان ژن ئێکسەر دێ دەرمانی بەت و چیت، لەورا رەنگە نەزانن کا چاوان ب کاربینن و ئەڤ چەندە کارتێکرنێ ل ساخلەمیا وان بکەت.
ل دووڤ ئاخفتنێن کچەکێ کو ل بەر دەرمانخانەکێ کاردکر دەما گەنجەک ل دەرمانخانێ داخوازا دەرمانەکێ سێکسی بکەت، ئەو گەلەک شەرم دکەت و ب تایبەت ھەکە ب تنێ ل دەرمانخانێ بیت و یا نەخۆش ئەوە دەمێ پرسیارا وانژی دکەت کا چاوان دێ ب کارئینیت! ئەڤە مافێ کچێ یە، چونکو رەنگە رەوشەنبیریا کەسێ قەستا دەرمانخانێ کری نە ل ئاستێ ڤان پرسیاران بیت!
ل دەمێ زەلام داخوازا دەرمانێن سێکسی دکەن و ژ ئەنجامێ وێ چەندێ کو پێزانین ل سەر ناڤ یان جورێ دەرمانی و کاریگەریا وی نینن دێ گەلەک درێژ کەن ھەتا بشێن مەرەما خۆ بێژن و پاشی دێ بێژنە دەرمانسازی بکەنە دناڤ عەلاگێن رەش دا، ئەڤەژی نیشانا وێ چەندێ یە کو شەرمەک ل دەڤ ھەیە و نەڤێت کەس ددەستاندا ببینیت.
ھندەک زەلام یان ژن ژی دچنە د دەرمانخانێڤە و خوە ل کوژیەکی دگرن، ھەتا ھەموو کەس دەرمانخانێ ڤالا دکەن و ژنوو دێ قەستا وان دەرمانا کەن، ب راستی پێدڤیە ل سەر دەرمانسازی ژی وان جورە دەرمانان بدانیتە ل پێشیێ یان ھەر چ نەبن ل جھەکێ بەرچاڤ بن داکو ل دەمێ خەلک ژی دھێت و داخواز دکەت گەلەک شەرم نەکەن، یان ب دەستی ئیشارەتێ ب دەرمانی بدەن و گەلەک خۆ و دەرمانسازی ژی نەوەستینن ب سالوخەتێن دەرمانی ڤە.
گەلەک جاران ژی ھندەک نوشدار ھەنە دێ تێلەفونا دەرمانخانێ کەن و بێژنێ ھەکە کەسەک ھاتە لایێ تە و ناڤێ مە ئینا ھەما فلان دەرمانان بدێ، ئەڤەژی کارەکێ نەدروستە و وێ چەندێ دیاردکەت کو نوشدار ژی پشتەڤانیێ ل شەرمینیا ڤان دەرمانان دکەن و ل شوونا وێ باشترە نوشدار نەخوشی پال بدەت کو بێی ترس و شەرم دەرمانان داخواز بکەت.
نەخۆشیێن سێکسی ژی وەکو ھەر نەخۆشیەکا دیترن و چ شەرم ب کارئینانا دەرمانێن واندا ژی نینە و یا باشتر ئەوە کەس ڤان دەرمانان بێی نوشداری ب کارنەئینیت، داکو تووشی سەربارکێن ژ ئەنجامێ وان پەیدادبن نەبن و ل دووماھیێ دبێژین شوولێ دەرمانسازی و کەسانێن ل بەر دەرمانخانێ کاردکەن ئەو نینە کو نیشا نەخوشی بدەن کا چاوان دێ ڤان دەرمانان ب کارئینن، بەلکو ئەڤە کارێ نوشدارێ تایبەتمەندە و ب ڤێ رێکێ نەدەرمانساز و نە نەخوش شەرمێ ژ ھەڤدو ناکەن بۆ کرین و پێدانا دەرمانان، بەلکو دێ مینیت نھێنیەکا چارەسەریێ دناڤبەرا نەخۆشی و نوشدارێ تایبەتمەند دا.

زێده‌تر نیشان بده‌

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *