ب تنێ 15 کەسا ل دھۆکێ ئەڤ نەخوشیە یا ھەی

نوش نيوز:

ب تنێ 15 کەس کو ھەشت ژێ ژنن و حەفت زەلامن، ئەڤ نەخۆشیە ل دھۆکێ ھەیە. وەکو پرسکان ل لەشی ‏دیار دکەن و پاشی د پەقن و پەقیشکێن ب ئێشان ژێ پەیدا دبن و ب درێژاھیا ژیانێ ل گەل نەخۆشی دمینن. ‏نەخۆش ھزر دکەن ئەڤە پەنجەشێرە، بەلێ ڤێ نەخۆشیێ جوداھی ل گەل پەنجەشێرێ ھەیە و ل دەمێن گەلەک ‏دژوار دبیت نەخۆش ل نەخۆشخانا سۆتنێ بھێنە نڤاندن و سەرەدەریا تایبەت ل گەل دھێتە کرن. ل گەل ڤێ ‏چەندێ ژی بێھن ژ لەشێ نەخۆشان دھێت و ئاریشەیێن جڤاکی ژی د ئەنجام دا ھەنە.‏

د. بەھدین جەلال باله‌تەی، تایبەتمەندێ نەخۆشیێن پیستی بۆ نۆش نیوز دیارکر کو ئەڤ نەخۆشیە ب ھاتنا ھندەک پرسکێن سۆر و ب شێوەیەکێ ب لەز دەست پێ ‏دکەت و دھێنە ڤەگوھاستن و دبنە پەقیشک و وەکو ‏ئاڤەکێ د ناڤ دایە و پاشی دبیت عەداڤ یان خوین بکەڤیتێ.‏

د. بەھدین دیارکر ژی کو د ھندەک دەلیڤان دا جور و قەوارێن ڤان پەقیشکان د ژێک جودانە و دەمێ د پەقن دێ ‏خوین بەربوونێ ل جھێ خۆ پەیداکەن و بۆ دەمەکێ درێژ دێ مینن و ئەڤ نەخوشیە گرێدايی نەخۆشیێن بەرگریا ‏لەشی نە و دەمەکێ درێژ دمینیت ھەتا خۆ لێک بدەتەڤە.‏

ھەروەسان گۆت: “ئەو پەقیشک گەلەک جاران بێھن دکەڤیتێ و نەخوش گەلەک ئالوز دبن و ئەڤ چەندە ژی ‏دبیتە ئەگەر کو ھندەک جاران ئاریشێن جڤاکی بۆ نەخوشخانێ پەیدا ببن و دەمێ قەستا نەخوشخانێ ‏دکەن، ئەم فۆرمێن تایبەت بۆ دادگرین دا کو ل دەمێن پێدڤی خزمەتا وان بھێتە کرن”.

گۆتژى: “ھەتا نوکە مە 15 ‏نەخۆشێن تووشی ڤی جورێ نەخۆشیێ بووين ھەنە د ژيێن جودادانە کو حەفت ژێ زەلامن و ھەشت ژنن و ‏ل دەمێن جودا حالەتێن وان گەلەک دژوار دبن، چونکو پەقینا وان وەکو سوتنێ یە، لەوا ئەم نەچار دبین نەخۆشێن وان ‏ل نەخۆشخانا سۆتنێ بنڤینین و سەرەدەریا سۆتیان ل گەل دھێتە کرن”.‏

ھەروەسان د.بەھدین دیارکر کو ئەو نەخۆشی ناھیتە ڤەگرتن ژ کەسەکی بۆ ئێکێ دیتر و گۆت: “ئەو پەقیشک ‏ئێشانێن زۆر ل نەخۆشی پەیدا دکەن و دەمێ د پەقن ھێشتا ئێشانا وان پتر لێ دھێت، ھەکە خوین د ناڤ دا بیت ‏ھەلبەت پەقینا وان دێ خوین بەربوونێ بۆ نەخۆشی پەیداکەن، ھەر وەسا ئێک ژ ئاریشێن بۆ نەخۆشی ‏پەیدا دبیت ئەوە دەمێ پەقیشک یان کولکێن ژ ئەنجامێ پەقیشکا پەیدا دبن ژ ئەنجامێ میکروبان بن و ل وی ‏دەمی دێ پلا گەرماتیا لەشێ نەخۆشێ بلند بیت و دێ ھندەک ئاریشێن دیتر ژی ژبلی یێن پیستی بۆ وی ‏پەیدا بن”.‏

ھەروەسان دیارکر کو پتریا ئەندامێن لاشی یێن ئەڤ نەخۆشیە تووش دبیتێ کەڤلێ سەری و دێم و سینگ و زک و ‏دەست و پێ و پشتن و ھندەک جارا ئەڤ نەخۆشیە پێش دکەڤیت و پتریا لاشی ڤەدگریت و گۆت: “د بەرێ دا ‏ھەر کەسێ تووشی ڤێ نەخۆشیێ د بوو رەنگە گیانێ خۆ ژ دەست دابایە، بەلێ ب پێشکەفتنا زانستێ نوشدارى ‏نوکە دەرمان ھەنە و ھندەک جورێن چارەسەریێ دەرکەفتینە کو ژیانا نەخۆشی ژ مەترسیێ قورتال دکەن”.‏

دەربارەی چارەسەریێ ژی گۆت: “ھەلبەت کورتیزونی رۆلێ خۆ د چارەسەریێ دا ھەیە و ئەو دەرمانێن ل ڤێ ‏دووماھیێ دەرکەفتین ھاریکارن بۆ ب ھێزکرنا بەره‌ڤانیا لاشی و هه‌تا رادەیەکى نەخۆشی دھێتە کونترۆلکرن و ھندەک ‏جاران ژی دەرمانێن تێکەل دھێنە دان بۆ ب ھێزکرنا بەرسينگگرتنا لاشێ نەخۆشی، بەلێ پێدڤیە نوشدارێ ‏تایبەتمەند وێ بڕیارێ بدەت و گەلەک یا گرنگە ھندەک پشکنینێن تایبەت و ب شێوەیەکێ رێکخستی بھێنە ‏ئەنجامدان”.‏

 
زێده‌تر نیشان بده‌

نيوار باشوورى

نيوار محه‌مه‌دسه‌ليم شوكرى ژ 2007ێ وه‌ره‌ وه‌كو رۆژنامه‌ڤان ل پارێزگه‌ها دهۆكێ كار دكه‌ت.

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *